சிலேடை(பாகம் 2)

ஒளவையார் தனது தள்ளாடும் வயோதிகப் பருவத்தில் இருந்த பொது குறிப்பறிந்து திருவாலங்காடு அருகில் இருக்கும் பழயநூரை சேர்ந்த சாரி என்பவன் அவருக்கு கோல் கொடுத்து உதவினான் . அதற்கு கைம்மாறு செய்ய விரும்பிய அவர் ஒரு கறவை ஆடு வாங்கிப் பரிசாக கொடுக்க நினைத்தார் . அதனால் அப்பொழுது ஆட்சியில் இருந்த சேர மன்னனை சந்தித்து நடந்ததைக் கூறி " ஒரு ஆடு வேண்டும் " என்றார் .சேர மன்னனோ ஒரு தங்க ஆட்டையே அவருக்கு பரிசாக அளித்தான் . இதை பாராட்டி பாடிய ஒளவை "சேரா , உன்னாடு பொன்னாடு " என்று வாழ்த்தினார் .இது ஒரு சிலேடை . நேரடியாக அவர் " உன் ஆடு பொன் ஆடு " என்று கூறுவதாகவும் கொள்ளலாம் . அதோடு "உன் நாடு பொன் நாடு " என்று அவர் வாழ்த்தியதும் பொருந்தும்.
-------------------------------------------------------------------------------------------------
நம்மில் பல பேருக்கு நன்கு தெரிந்த ஒளவை மூதாட்டியின் ஒரு பாடல் .


வாக்குண்டாம் நல்ல மனமுண்டாம்
மாமலரால் நோக்குண்டாம் மேனிநுடுங்காது பூக்கொண்டு
துப்பார் திருமேனி தும்பிக்கையான் பாதம்
தப்பாமல் சார்வார் தமக்கு.

இப்பாடலுக்கு மேலெழுந்தவாரியான பொருள் :

" யானை முகத்தவனைத் தவறாமல் என்றும் வணங்கி வருபவர்களுக்கு நல்ல வாக்கு , நல்ல மனம் ,இலக்ஷ்மி தேவியின் நல்ல பார்வை ஆகிய இம்மூன்றும் கிட்டும் ."

இப்பாடலில் மறைந்துள்ள மற்றொரு பொருளையும் காண்போம் .நீண்ட நாள் வாழ்தற்க்குரிய அருமருந்தான காயகல்பம் செய்யும் முறையைப் பாட்டி கூறுகிறார்கள் .
1. துப்பார்த்திருமேணி - திரு அடைமொழி . துப்பு - குப்பை .மேனி .இச்செடி எங்கும் வளர்ந்திருக்கும் .
2. தும்பிக்கையான் பாதம் - அனைநெருஞ்சி
3. மாமலர் - தாமரை.

குப்பைமேனி இலை , ஆனைநெருஞ்சி இலை , ஓரிதழ்த் தாமரை இவற்றைச் சம அளவில் எடுத்து பனங்கற்கண்டு , பசுநெய் , தேன் ஆகிய மூன்றுடன் சேர்த்து செய்ய கிடைப்பதே காயகல்பம் . இந்த மருந்தை உண்டால் நல்ல வாக்கு வன்மை பெரும் .நல்ல மனம் உண்டு (உடலில் எந்த இடையூறும் வராது ) நல்ல நோக்கு - நல்ல பார்வை கிட்டும் , மேனி நுடங்காது - உடல் தொய்வு ஏற்படாது .எனவே இரண்டிற்கும் வழி காட்டிய ஒளவையை போற்றி வாழ்வோம் .
-------------------------------------------------------------------------------------------------

ஸ்ரீ சுவாமிநாத சுவாமியை வணிகச் செட்டியாராக பாவித்து , இரு பொருள்படும்படி பாடல் ஒன்றை இயற்றியுள்ளார் சொக்கநாதப் புலவர் . அது :

" வெங்காயம் சுக்கானால் , வேந்தயத்தால் ஆவதென்ன
இங்கார் சுமந்திருப்பார் இச்சரக்கை - மங்காத
சீரகத்தைத் தந்தீரேல் தேடேன் பெருங்காயம்
எரகத்துச் செட்டியாரே "

இதற்கு , " அஜீரணத்தைப் போக்க ரசம் சாப்பிடு , குணம் அடையலாம் " என்றும் , " உடம்பு தளரும் போது நம் ஆன்மாவுக்கு வீடுபேற்றை தரவல்லது ஸ்ரீ ச்வாமினாதறது பேரருள் மட்டுமே " என்றும் இரு வேறு பொருள் கொள்ளலாம் .

[குறிப்பு]
வெங்காயம் -> வெம்மையான காயம்(உடல்)
சுக்கு -> சுக்கு போல் சிரியதாக
வெந்தயம் -> அயக்கந்த சிந்தூரம்
இச்சரக்கை ->இவ்வுடலை
சீரகத்தை -> சீரான மனத்தை
பெருங்காயம் -> பெரிய உடல்
ஏரகத்து செட்டியார் -> திருவேரகம்(சுவாமிமலை) முருகன் .

-------------------------------------------------------------------------------------------------
திருமணம் ஒன்றில் மணமக்களை சிவனும் திருமாலும் காக்க வேண்டும் என்று சிலேடையாக பாடியது .(காளமேகப் புலவர் பாடல் )

" சாரங்க பாணியர் அஞ்சக்கரத்தர் கஞ்சனைமுன்
ஓர்அங்கம் கொய்த உகிர்வாளர் - பார்எங்கும்
எத்திடுமை ஆகர் இனிதால் இவர்உம்மைக்
காத்திடுவர் எப்போதும் காண்" .

1. சாரங்க ->சார்+அங்க(சால்புடை அங்கத்தினர்) , சாரங்கம் எனும் வில் கொண்டவர்.
2.அஞ்சக்கரத்தர் ->ஐந்து அக்கரத்தை(அட்சரம்) உடையோர்(நமசிவாய), அம் (அழகான) சக்கரத்தைக் கொண்டவர்.
3.ஓரங்கம் கொய்த => ஓர் அங்கம் அளித்த (உமையொரு பாங்கன்), ஓரங்கம்(திருவரங்கம்)

மேற்காணும் ஒற்றுமைகளால் சிவனும் திருமாலும் இப்பாவில் ஒன்றாகின்றனர்.

[ ஓம் நம சிவாய , ஓம் நமோ நாராயணாய ]

சிலேடை
ஆர்குட்டில் சிலேடைப்பற்றிய ஒரு நல்ல இழையிலிருந்து சில துளிகள்.
தமிழில் பல சிறப்பான வெண்பா வகைகள் உள்ளன. இவற்றுள் இரட்டுற மொழிதல் மிகவும் அழகான சிந்தனையை தூண்டுவதாகவும் இருக்கும் ஒரு வகை .இரு பொருள்பட செய்யுள் இயற்றுவதே சிலேடை ஆகும் .

செங்கல்பட்டு பெருங்காயம்
பொருள் ஒன்று : செங்கல் பட்டு பெரும் காயம் .(அதாவது அடி படுவதை பற்றி பேசுகிறோம்).
பொருள் இரண்டு : செங்கல்பட்டில் இருந்து வரும் பெருங்காயம்.(சமையல் பொருள்).
அடுத்து ...தலை விதி வசம் மற்றும் அதன் வேற்றுமையான தலைவி திவசம் .
கவி காளமேகம் இதற்க்கு மிகவும் பெயர் பெற்றவர். அவரது பாடல்களை தெரிவிப்பதற்கு முன்பு அழகிய சொக்கநாதர் பாடல் ஒன்றைப் பார்போம் .

சக்கரத்தி னாலரவந் தாங்குதலி னோடுமுள்ளெட்
அக்கரத்தி னால்வேலை யார்வதினால் - மிக்கவன்பர்
முக்கியமாய்க் கைக்கொளலால் முத்துசா மித்துரையே
கைக்கடியா ரந்திருமால் காண்.

பொருள் :
இது திருமாலுக்கும் கைக்கடிகாரத்துக்குமான சிலேடை .
கடிகாரம்:
1. சக்கர வடிவை உடையது .
2. ஒருவித ஓசையைக் கொண்டுள்ளது .
3. முள் தொடுகின்ற எண்ணையும் எழுத்துக்களையும் உடையது .
4. சிறந்த வேலைப்பாடு உடையது .
5. விரும்பும் அன்பர் கைக்கு அழகூட்டுவது .

திருமால் :
1. சக்கராயுதத்தை உடையவர் .
2. ஆதிசேடனாகிய பாம்பணைமேல் பள்ளிகொள்பவர்.
3. ஓம் நமோ நாராயணாய என்ற அட்டாக்கர மந்திரத்தால் வணங்கப்படுபவர் .
4. திருப்பாற்கடலில் எழுந்தருளி உள்ளவர் .
5. மெய் அன்பர்களால் கைகூப்பித் தொழும் தன்மையர் .

ஆலமர்க் கடவுள்
பொருள் 1: கல்லால மரத்துக்கு அடியில் இருந்து தனது மௌனத்தாலேயே அனைத்தையும் கற்பிக்கும் தென்முகக் கடவுள் .(தக்ஷிணாமூர்த்தி )
பொருள் 2 : ஊழிக் காலத்தே உலகினைத் தன்னுள் அடக்கி ஆலிலைத் தளிரிலே படுத்திருக்கும் குழந்தைக் கண்ணன் .

அடிநந்தி சேர்தலா லாகம் வெளுத்துத்
கொடியுமொரு பக்கத்திற் கொண்டு -வடிவுடைய
மாசுணத்தை பூண்டு வளைத் தழும்பு பெற்றதனால்
பூசணிக்காயும் ஈசனெனப் போற்று!

பூசணிக்காய்:-
அடி நந்தி சேர்தலால் - அடிப்பாகத்தே பெரிய காம்பு சேர்ந்திருக்க விளங்குவதால்
ஆகம் வெளுத்துத் - உடல் வெளுத்து
கொடியும் ஒரு பக்கத்திற் கொண்டு - ஒரு பக்கத்தே கொடியினைக் கொண்டு
வடிவுடைய மாசுணத்தை பூண்டு - அழகான வெண்நிறத்தை மேல் கொண்டு
வளைத் தழும்பு பெற்றதனால் - வளைவான தழும்புகளை மேல் கொண்டதனால்
பூசணிக்காயும் ஈசனெனப் போற்று! - பூசணிக்காயையும் ஈசனாகக் கருதிப் போற்றுவாயாக!

சிவபெருமான்:
அடிநந்தி சேர்தலால் - திருவடியிலே நந்திப்பெருமான் சேர்ந்திருத்தலாலும்
ஆகம் வெளுத்துத் - திருநீறணிந்து உடல் வெண்மையையாய் இருப்பதாலும்
வடிவுடைய கொடியுமொரு பக்கத்திற் கொண்டு - ஒரு பக்கத்தில் பூங்கொடியாய உமையைக் கொண்டு
மாசுணத்தை பூண்டு - சிறந்த பாம்பு ஆபரணத்தைக் கொண்டுவளைத்
தழும்பு பெற்றதனால் -தன் திருமேனியினிடத்தே அம்மை தழுவியதால் ஏற்பட்ட வளையல் தழும்புகளைக் கொண்டவர் சிவபெருமான்.